Enghraifft - Plant Anabl yn Cyfri Cymru
Mae Plant Anabl yn Cyfri Cymru yn ymgyrch ar y cyd sy'n cael ei arwain gan
4 prif sefydliad sydd yn gweithio gyda phlant anabl a'u teuluoedd - Anabledd
Dysgu Cymru; Plant yng Nghymru; Mencap Cymru; a Cyswllt Teulu Cymru. Pwrpas
Ymgyrch Plant Anabl yn Cyfri Cymru yw i ddod a phlant a phobl ifanc anabl
ynghyd, gyda'u teuluoedd a'u ffrindiau i sicrhau bod Llywodraeth y Cynulliad
yn gweithredu ei addewid i flaenoriaethu plant a phobl ifanc anabl. Cafodd
ei sefydlu yn Haf 2007 ac un o'i ymgyrchoedd cyntaf oedd i ddwyn sylw i'r
ffaith bod angen gwneud mwy i gefnogi plant anabl a'u teuluoedd.
Daeth yr angen am hyn yn amlwg iawn wedi cyhoeddi adroddiad y Fframwaith Gwasanaeth Cenedlaethol (NSF) Plant a Phobl Ifanc, oedd yn dangos bod gwasanaethau i blant anabl ymhell o'r safon angenrheidiol. Dangosodd yr Adroddiad ar Offeryn Archwilio Hunanasesu NSF 06/07 mai Plant a Phobl Ifanc Anabl yw'r adran wanaf yn gyson ledled Cymru o ran darparu gwasanaethau.
Yn wyneb yr adroddiad hwn a methiannau eraill o ran gweithredu polisi, mae gan yr Ymgyrch Plant Anabl yn Cyfri Cymru saith nod allweddol:
- Gwybodaeth gywir ar yr amser cywir
- Dewis gwirioneddol o ran safon addysg
- Y gwasanaethau iechyd maent eu hangen i fyw bywydau normal
- Mynediad llawn i weithgareddau chwarae a hamdden
- Llais gwirioneddol o ran cynllunio'r gwasanaethau maent eu hangen
- Mynediad llawn i wasanaethau cymunedol
- Digon o arian i fyw arno
Dechreuodd Positif Politics weithio gyda Plant Anabl yn Cyfri Cymru yn Hydref 2007 er mwyn datblygu strategaeth i gael y llywodraeth i flaenoriaethu'r 7 nod yma. Un nod allweddol o'r ymgyrch oedd sicrhau bod gwasanaethau i blant anabl yn cael eu hariannu yn briodol. Yn Lloegr, fe wnaeth strategaeth "Aiming High for Disabled Children: Better Support for Families" Llywodraeth y DU arwain at ryddhau £21m ychwanegol i'r Cynulliad Cenedlaethol. Fodd bynnag, nid oedd awgrym y byddai'r arian yn cael ei wario ar blant anabl yng nghynlluniau gwariant gwreiddiol Llywodraeth y Cynulliad. Fe wnaeth Positif Politics a the Pollen Shop weithio gyda Plant Anabl yn Cyfri Cymru i newid blaenoriaethau gwario y llywodraeth. Fe wnaeth ein gwaith ar y cyd gynnwys lobi fawr o Aelodau Cynulliad a Gweinidogion; cryfhau ac atgyfnerthu neges a phwyntiau strategol yr ymgyrch yn ystod cylch cynllunio cyllideb y Cynulliad; ac, yn benodol, gweithio i sicrhau bod Datganiad Barn a gafodd ei gyflwyno gerbron y Cynulliad yn ennill llofnod pob Aelod Cynulliad oedd yn gymwys i wneud hynny. Trwy weithio ar y cyd, fe wnaethom helpu i sicrhau mai Datganiad Barn Lynne Neagle AC, oedd yn galw am glustnodi adnoddau sylweddol ychwanegol yng nghyllideb y Cynulliad ar gyfer plant anabl, oedd un o'r Datganiadau Barn cyntaf erioed i ennill cefnogaeth POB Aelod Cynulliad mainc gefn. Cafodd yr ymgyrch sylw helaeth hefyd yn y wasg brint a'r cyfryngau.
O ganlyniad i'r Ymgyrch, fe wnaeth Llywodraeth y Cynulliad ddod ynghyd gyda'r Cynulliad Cenedlaethol a chytuno i flaenoriaethau gwasanaethau ar gyfer plant anabl dros y blynyddoedd nesaf. Addawodd y Gweinidog Plant, Addysg, Dysgu Cydol Oes a Sgiliau, Jane Hutt AC, y canlynol mewn Datganiad Ysgrifenedig ar 6ed Rhagfyr 2007, mewn ymateb i ymgyrch Plant Anabl yn Cyfri Cymru:
- £1 miliwn ychwanegol ar gyfer chwarae cynhwysol yn 08-09;
- £1 miliwn ar gyfer deunyddiau blynyddoedd cynnar;
- £225,000 ar gyfer 2 le newid symudol ar gyfer digwyddiadau mawr ac addasiadau i 5 lleoliad digwyddiadau mawr yng Nghymru;
- Arweiniad clir gan un Gweinidog mewn perthynas a phlant anabl yng Nghymru a'u teuluoedd, gan gynnwys adolygiad o strwythurau'r llywodraeth yn y maes;
- Ymroddiad i ddatblygu strategaeth clir dros dymor Llywodraeth y Cynulliad i wella darpariaeth a chydlynu gwasanaethau ar gyfer plant anabl a'u teuluoedd;
- Cyhoeddiad o gronfeydd ychwanegol sylweddol ar gyfer gwasanaethau i blant anabl;
- Sicrwydd y byddai Ymgyrch Plant Anabl Cymru Gyfan yn aelodau o'r Tasglu fyddai'n cael ei sefydlu ar unwaith i edrych ar gynllunio a gweithredu polisïau a blaenoriaethau materion ar gyfer newid a gwariant ychwanegol.